Pertsonak erdigunean kokatuko dituen eta etorkizuneko erronkei erantzungo dien Legazpi eraiki nahi dugu, irisgarriagoa eta oinezkoentzako espazio gehiago izango dituena, mugikortasun jasangarria sustatuko duena, eta iraunkortasuna zein trantsizio energetikoa oinarri izango dituena.  

Helburu horien erdiesteko hainbat plan idatziko ditugu, herritarrekin elkarlanean eta beste administrazio batzuekin adostuta. Plan horien bidez etorkizuneko Legazpik nolakoa izan beharko duen finkatuko dugu eta asmo hori errealitate bihurtzeko beharrezkoak diren jarduketak martxan jartzeari ekingo diogu. 

Legazpiren nortasunarekin hertsiki lotuta dago bere ondare natural eta kulturala. Berau zaindu eta balioan jarrita, etorkizunera begiratzera da gure helburua.  

Azken urteetan eraikitako kultur ondarea babesteko hainbat ekimen aurrera eraman dira plan ezberdinen bitartez. Udalaren asmoa da babestutako auzoak birgaitu eta biziberritzeko proiektu eta ekintzak gauzatzea, horietan bizitzea erakargarria, irisgarria eta erosoa izan dadin. Erabiltzen ez den eraikitako ondareak nekez iraungo duelako etorkizunean. Lan horiek kostu handia dutenez, Udalak beste administrazioekin aliantzak josi eta dirulaguntzak lortzea du xede.  

Horrez  gain,  Legazpiren  iraganean  hain  garrantzitsua  izan  zen  Olaberria  burdinola kontserbatu,  berreskuratu  eta  jendearen eskuragarri jartzeko pausuak emango ditugu. Hain garrantzitsua den jarduketa hau gauzatzeko diru-laguntzak erdiesteko lan egingo dugu.  

Legazpiko udal azaleraren % 96 lurzoru urbanizaezina da. Ondare horrek berebiziko garrantzia du, ez bakarrik nekazaritza- sektorearentzat, baita klima-aldaketa arintzen eta gure paisaia mantentzen laguntzen duelako ere. Horretarako, udal lurrak hedatzea aurreikusten dugu, basoak zein larreak era jasangarrian kudeatu eta eraldatzeko. Enfasia jarriko dugu Arrobi inguruan, baina herri osoko landa-bide publikoak hobetzen jarraituko dugu era berean. 

Herritarrei Legazpi garbia, irisgarria eta zaindua eskaintzea funtsezkoa da, dagoena balioan  jarri eta mantentzea bezalaxe. Horregatik, mantentze- lanei garrantzia berezia emango diegu espazio publikoa eta udal eraikinak egoera hoberenean mantentzeko. Horretarako beharren eta lehentasunen inguruko azterketa xehatua egingo dugu, plangintza garatzeko eta aurrera eraman beharreko lanak sistematizatzeko.

Pertsona garatzeko funtsezkoa da seguru sentitzea. Legazpiar guztiak edonoiz eta edonon lasai sentiarazteko, gertutasunean oinarritutako ereduan sinisten dugu.  

Helburu hori lortzeko, alde batetik espazio publikoan dauden puntu beltzen interbentzio plana idatzi eta martxan jarriko dugu agintaldi honetan. Horiek ezabatzeko, hirigintza-tresnak, hiri-diseinua, teknologia eta udaltzaingoaren agenteak erabiliko ditugu.  

Bestalde, udaltzaingoa herritarrengana gerturatzeko plana ere idatziko dugu, lehen sorospenak eta bide hezkuntza izango dituena ardatz, besteak beste.