Duela bi legegintzaldi, gobernu-taldeak antolaketa-egitura egokitzeko lanei ekin zien, egitura hori eraginkorragoa izan dadin politika eta kudeaketa bateratzeko orduan. Zuzendaritza sortu zen eta, Udalbarria ereduari jarraiki, batzorde politikoen eta antolaketa-arloen egitura sinplifikatu zen.  

Hala ere, egitura hori balioan jarri beharra dago, eta haren eraginkortasuna sustatu behar da, erakundea osatzen duten pertsonak haztea ahalbidetuko duten ekintzen bidez, haiengan oinarrizko ondoko balioak sustatzeko xedearekin: talde-lana, interakzioa, balio- aniztasuna, sistematizazioa eta kalitatea.

Erakunde honetan lan egiten duten pertsonak dira kapitalik garrantzitsuena, haiek baitira gobernuak garatzen dituen politika publikoak herritarrengana ahalik eta ondoen iritsiko direla bermatzen dutenak.  

Gaur egun, urteko prestakuntza-planak egiten dira baina nahitaezkoa da prozesu horiek plantillaren zati esanguratsu batera zabaltzea eta sailen arteko prestakuntza sustatzea.  

Bestalde, aurreko helburuari dagokionez adierazten den bezala, bere garaian antolaketa-egituraren funtsezko erreformari ekin zitzaion arren, Giza Baliabideen arloko ekintza asko egin gabe geratu ziren.  

Lanpostuen azkeneko balorazioa duela 20 urte baino gehiago egin zen. Ordua da hura berritzeko, horrez gain, egungo garaietara egokitutako  lanpostuen  deskribapena  txertatu  beharra  dago,  bai  eta  jarduna  ebaluatzeko  sistema  bat  ere,  ordainsari-sistema modernizatu eta bidezkoago egingo duena, eta, aldi berean, proiektu berritzaileak sortzea eta abian jartzea sustatuko duena. 

Administrazioak herritarrekin eta beste administrazio batzuekin dituen harremanetan, zaila da teknifikazio prozesuek amaiera definitua izatea. Begi bistakoa da, hala ere, administrazio elektronikoak bultzada bat behar duela administrazioan bertan eta herritarrengan.  Udalean erabiltzen ditugun kudeaketa-aplikazioak integratzeko lanei amaiera eman nahi diegu, Udal Inbentarioa sartuz.  

Bestalde, nahiz eta Udalak aurrerapen handiak egin dituen bere administrazioan teknologia berriak sartzeari dagokionez (ia % 100 elektronikoa), ezin dugu ahaztu herritarrek ere tresnak, gaikuntza eta bermeak behar dituztela Udalarekin elektronikoki harremanetan jartzeko. 

Eremu publikoan gobernantza ona eta etika sustatzea, gardentasuna, parte hartzea, zintzotasuna eremu pubiikoan,. bezalako kontzeptuek jarduteko joerak izateari utzi diote eta lehen mailako eskakizun instituzionalak izatera iritsi dira. Urte asko dira Legazpiko Udala kontzeptu horiekin konprometituta dagoela eta ezin du Gobernu-plan batean eredugarritasuna aipatu gabe utzi. Legazpiko Udala Euskadin lehena izan zen Erakundearen Zuzentasun sistema onartzen, gobernantzaren eta etika publikoaren esparruan jarduteko tresna gisa. Sistemarekin batera, arduradun publikoentzako (gobernuan ardurak izan edo ez) eta langileentzako kode etikoak onartu dira.  

Bi  kode  etiko  onartzea  falta  da:  Udalarekin  kontratuak  egingo  dituzten  erakundeentzako  eta  Udalaren  dirulaguntzak  jasoko dituztenentzako.  

Legazpiko Udalak lan ona egin du gardentasunaren arloan, atari operatibo eta eguneratu batekin. Hala ere, kontuak ematearen eta parte-hartzearen eremuko jarduketak ere behar dira, kudeaketa publikoan gobernantza integralean aurrera egiteko.